Kredit Kartından Səmərəli İstifadə Etmək üçün Bilməli Olduğunuz Əsas Anlayışlar
Kredit kartı terminlərini anlamaq
Kredit kartınızı əldə etdikdən sonra aylıq çıxarışınızı izləmək olduqca vacibdir. Hər ay nə qədər xərclədiyinizi və nə qədər ödəniş etməli olduğunuzu bilmək, maliyyə nizamınız üçün əsasdır.
Kredit kartları ilə bağlı əsas anlayışlara sahib olmaq, bu maliyyə alətindən ən səmərəli şəkildə istifadə etməyin əsas sirridir. Bir çox insan aylıq çıxarışlara baxdıqda orada yazılan bəzi terminləri anlamaqda çətinlik çəkir və ya kartın təqdim etdiyi imkanlardan tam xəbərdar olmur.
Kredit kartı ilə bağlı bilməli olduğunuz əsas anlayışlar
Minimum ödəniş məbləği: Kredit kartı üzrə hər ay son ödəniş tarixinədək ödəməli olduğunuz minimum məbləğdir. Bu məbləğə əgər varsa əvvəlki dövrlərdən gecikmiş borclarınız da daxil edilir.
CVC kodu: “Card Verification Code” – yəni Kartın Doğrulama Kodu deməkdir. Kredit və ya debet kartının təhlükəsizliyini təmin etmək üçün istifadə olunan üç və ya dörd rəqəmli koddur. Bu kod, kart sahibinin kartı fiziki olaraq əlində saxladığını təsdiqləyir və xüsusilə onlayn alış-verişlərdə təhlükəsizliyi artırır.
Hesab çıxarışı (ekstresi): Hər ay mütəmadi olaraq təqdim olunan və əvvəlki hesabat dövrü ilə cari hesabat dövrü arasındakı xərcləri, limit məlumatlarını, bonusları, borcları və ödənişləri əks etdirən sənəddir.
Faiz dərəcələri: Ödənilməmiş borclara tətbiq olunan aylıq faiz dərəcələridir. Faizlər adətən borcun müəyyən faizi ilə hesablanır. Maliyyələşdirmə xərci, götürülən kreditə görə borcalanın ödəməli olduğu ümumi məbləği ifadə edir. Əgər nəğd pul çıxarışı etmisinizsə, əlavə olaraq komissiya haqqı tətbiq olunur.
Gecikmə faizi: Kredit kartı borcunuzu son ödəniş tarixinədək ödəmədiyiniz halda, həmin borca tətbiq edilən əlavə faizdir.
Ticarət müəssisəsi (iş yeri): Kredit kartı ilə xərcləmə etdiyiniz yer və ya xidmət göstərən fiziki və ya onlayn məkan.
Qalan taksit: Kredit kartı ilə etdiyiniz taksitli alışların ödənilməmiş hissəsidir. Bəzi banklar ümumi kredit kartı borcunuzu müəyyən faizlə yenidən taksitləşdirmə imkanı da təklif edir.
Keçmişdən qalan borc: Əvvəlki dövrdə tam olaraq ödənilməmiş və növbəti aya keçən borcdur.
Cari dövr xərcləri: Hesab çıxarışında qeyd olunan və iki hesab dövrü arasında etdiyiniz bütün xərcləri əhatə edən məbləğdir. Adətən bu dövr 30 gün davam edir.
Hesabın bağlanma tarixi: Kredit kartı üzrə xərclərin, borcların və ödənişlərin ümumiləşdirildiyi tarixdir. Bu tarixdən sonra etdiyiniz xərclər növbəti hesab dövründə əks olunur.
Kredit limiti: Kredit kartı ilə istifadə edə biləcəyiniz maksimum məbləğdir. Əgər bir neçə kartınız eyni hesaba bağlıdırsa, bu kartlar ümumi limitdən istifadə edir.
Kartın etibarlılıq tarixi: Bu kredit kartının ön hissəsində göstərilir və bu tarix kartın hansı vaxta qədər keçərli olduğunu bildirir. Bu tarixə yaxınlaşdıqda və ya keçdikdə bank tərəfindən yeni kart təqdim olunur, köhnə kart isə avtomatik deaktiv edilir.
Son ödəniş tarixi: kredit kartı üzrə borcun ödənilməsi üçün müəyyən edilmiş son gündür və bu tarix, adətən hesab bağlanma tarixindən minimum 10 gün sonrasına təyin olunur. Əgər bu tarixdən sonra borcunuzu ödəsəniz, gecikmə faizi tətbiq edilir və kredit reytinqinizə mənfi təsir göstərə bilər. Minimum ödəniş məbləğini belə ödəməsəniz, bu hal kredit tarixçənizdə "gecikmiş ödəniş" kimi qeyd olunur.
Nağd avans: kredit kartı vasitəsilə bankomatdan və ya birbaşa bankdan nağd pul əldə etməyə imkan verən xidmətdir. Bu vəsait ümumi kredit limitinizdən çıxılır və əməliyyata görə bank tərəfindən komissiya haqqı, həmçinin alış-veriş əməliyyatlarına nisbətən daha yüksək faiz tətbiq olunur. Faiz hesablaması isə vəsait çıxarılan gündən etibarən başlayır.
PIN kodunuzu heç kimlə paylaşmayın
PIN (Şəxsi İdentifikasiya Nömrəsi) — kartınızla bankomat əməliyyatları aparmaq, hesablarınıza çıxış əldə etmək və alış-veriş zamanı istifadə etmək üçün təyin etdiyiniz gizli koddur. Bu kodun həm yaradılması, həm də istifadəsi zamanı onun məxfiliyini qorumaq və heç kimlə paylaşmamaq vacibdir.
Əsas kredit kartı terminləri
Sabit faiz dərəcəsi: bazar şəraitindən və müqavilə şərtlərindəki dəyişikliklərdən asılı olmayaraq, müəyyən edilmiş və dəyişməyən illik faiz göstəricisidir.
3D Secure: İnternet üzərindən edilən kredit və debet kartı əməliyyatlarında təhlükəsizliyi artırmaq üçün hazırlanmış identifikasiya sistemidir. Bu sistem, kart sahibinin şəxsiyyətini təsdiqləyərək fırıldaqçılıq riskini minimuma endirməyi hədəfləyir.
Faizsiz ödəniş müddəti: Kredit kartı ilə etdiyiniz xərclərin faiz tətbiq edilmədən ödənilə biləcəyi müddətdir. Bu dövr adətən 10 gün olur. Məsələn, kartınızın hesab bağlanma tarixi 1 maydırsa və siz 11 may tarixinədək bütün borcunuzu ödəyirsinizsə, heç bir faiz tətbiq olunmur.
İllik faiz dərəcəsi: Kredit kartında ödənilməmiş borca tətbiq olunan illik faiz məbləğidir. Bu faiz, gecikmiş və ya dövr olunmuş borclar üçün hesablanır.
Kredit kartının təqdim etdiyi üstünlüklərdən faydalanın, həyatınızı asanlaşdırın
Kredit kartından ilk dəfə istifadə etdikdə bu proses bir qədər qarmaqarışıq görünə bilər, lakin kartla bağlı anlayışlara yiyələnib, onu düzgün şəkildə idarə etsəniz, hər şey asanlaşacaq. Kredit kartından balanslı və məsuliyyətli şəkildə istifadə etməklə, siz daha düşüncəli istehlakçı ola bilər və bu maliyyə vasitəsinin təqdim etdiyi gündəlik rahatlıq və üstünlüklərdən yararlana bilərsiniz.
