Bel çantası ilə Səyahətə Çıxanlar üçün Tövsiyələr
Yüngül səyahət edin
Bel çantası ilə səyahətin qızıl qaydası – az əşya ilə yola çıxmaqdır. Gəzintiniz qısa və ya uzun olsa da, bel çantasını geyinməyəcəyiniz köynəklər, şortlar, artıq 3-5 cüt şalvarla doldurmağa heç ehtiyac yoxdur. Heç vaxt geyinməyəcəyiniz ayaqqabıları niyə boş yerə daşıyasınız?
Səyahət etdiyiniz yer harada olursa olsun, məqsəd yalnız bir bel çantası ilə yola çıxmaq olmalıdır. Çoxsaylı ayaqqabı, müxtəlif geyimlər, saç düzləşdiricisi və ütü? Heç ehtiyac yoxdur. Doğru paltar və əşyalarla hazırlanan əl yükü sizə çox sayda üstünlük qazandıracaq.
Ehtiyacınız olduğunu düşündüyünüz geyimlərin yarısını götürün! Unutmayın, istifadə etməyəcəyiniz əşyaları yolda kürəyinizdə daşımaq istəməzsiniz.
Tək çanta ilə yüngül olmaq – baqaj vermək, gözləmək, əşyaları yığmaq və “nəyisə unutmamışam ki?” stressindən xilas olmaq deməkdir. Üstəlik, az əşya ilə getdiyiniz üçün qayıdanda bol xatirə ilə geri dönmək daha asan olacaq.
Səyahət sığortası etdirin
Bunu çoxları unutsa da, səyahət zamanı sığorta etdirmək sağlamlığınız üçün vacibdir. Tanımadığınız bir ölkədə xəstələndikdə özünüzü daha güvənli hiss etməyə ehtiyac duyacaqsınız. Avropa, Yaponiya və ABŞ kimi səhiyyə xərclərinin yüksək olduğu ölkələrdə kiçik bir narahatlığın belə maliyyəti yüzlərlə dollar ola bilər.
Buna görə də, səyahətinizə uyğun sığortanı diqqətlə seçmək və təfərrüatları oxumaq faydalı olacaq. Eyni zamanda gedəcəyiniz ölkədə riayət etməli olduğunuz sağlamlıq qaydalarını da öncədən öyrənin.
Peyvəndlərinizi vurdurun
Sağlamlıq, adətən itirdikdən sonra dəyərini anladığımız bir nemətdir. Bunu ən yaxşı yaşayanlar anlayır. Uzaq Şərq, Afrika və Cənubi Amerika kimi tropik bölgələrə getməyi planlayırsınızsa, əvvəlcədən peyvənd olunmaq vacibdir.
Sıtma, sarı qızdırma hələ də bu coğrafiyalarda geniş yayılmış xəstəliklərdəndir. Tetanus kimi xəstəliklərə qarşı da mütləq peyvənd olunmaq lazımdır. Əksər hallarda bu peyvəndləri asanca və pulsuz etdirmək mümkündür, ona görə təhlükəyə atılmağa dəyməz.
Sənədlərinizi səyahətdən əvvəl tamamlamağı unutmayın
Bəzi ölkələr vizə müraciətlərini yalnız sizin yaşadığınız ölkədən qəbul edir. Bir çox Şengen ölkəsi, eləcə də ABŞ və Avstraliya kimi ölkələr viza üçün çoxlu sənəd tələb edir.
Əvvəlcə planınızda olmayan bu kimi ölkələrə səfər etmək fikrinə sonradan gəlsəniz, yanınızda olmayan sənədlərə ehtiyacınız olacaq. Bu isə sizə poçt xərcləri, telefon zəngləri və məktubun gəldiyi ünvana çatmasını gözləmək kimi həm pul, həm də vaxt itkisinə səbəb ola bilər.
Səyahətdən əvvəl pasportunuzun və vizalarınızın son etibarlılıq tarixlərini yoxlayın.
Yanınızda şəxsiyyət fotosu götürün
Əgər səyahətiniz müddətində bir neçə ölkəyə getməyi planlaşdırırsınızsa, pasport üçün uyğun ölçü və texniki xüsusiyyətlərə uyğun çəkilmiş fotoşəkillərə ehtiyacınız olacaq. Qaldığınız oteldən uzaqda yerləşən bir səfirliyə gedib, foto olmadan geri dönmək və gününüzü foto studiyası axtararaq keçirmək istəməzsiniz.
Zaman məhdudiyyəti olan bir səyahətçisinizsə, zaman itkisi həm də maddi itki deməkdir.
Stereotiplərdən çıxın, fərqli marşrutlar seçin
Fotoşəkillərini tez-tez gördüyünüz, haqqında çox yazılan yerlər var və əlbəttə, onları görmək istəyirsiniz. Amma unutmayın ki, az tanınmış, əsl kəşf hissi verən yerlər də var. Üstəlik, bu yerləri tapmaq üçün mütləq çox araşdırmağa da ehtiyac yoxdur.
Əlinizdəki turistik bələdçilərdə yazılmayan yerləri seçin. İnanın, qayıtdıqda paylaşacağınız fərqli və orijinal fotolar hər kəsin xoşuna gələcək.
Hər şeyi planlaşdırmayın
Bilinməyən bir yerə gedərkən özümüzü təhlükəsizlik hissi ilə qorumaq istəyirik. Hər şeyi siyahılaşdırmaq, hətta saat-saat planlamaq bəzən özümüzü rahat hiss etdirməyə kömək etsə də, çox da əyləncəli olmur.
Plan etmədən, o anın axarına uyğun hərəkət etmək sizə fərqli və unudulmaz təcrübələr qazandıra bilər. Rahat olun, səfərinizdə sürprizlərə açıq olun və xatirələr üçün boşluq buraxın.
Əlbəttə ki, sağlamlıq, təhlükəsizlik, viza, hava şəraiti kimi dəyişkənlik göstərə biləcək faktorlar üçün əvvəlcədən ehtiyat planlarınızın olması həm vaxt, həm də pul qənaəti baxımından faydalı olacaq.
Kağız xəritə yerinə mobil tətbiqlərdən istifadə edin
Xüsusilə turistlərlə dolu şəhərlərdə, yerli insanlar dar küçələrdə nəhəng kağız xəritə açan turistlərdən xoşlanmır. Bunun əvəzinə ağıllı telefon və ya planşetə yüklənmiş xəritə tətbiqləri sizi itməkdən qoruyur.
Amma unutmayın, bəzən səyahətin ən gözəl hissəsi “itmək” deyilmi? Elə bu zaman maraqlı yerlərlə qarşılaşmaq da mümkündür.
Bel çantası örtüyü vacibdir
Geyimlərinizin yağışda islanması, noutbukunuzun sıradan çıxması, pasportunuzdakı vizaların silinməsi kimi problemlər yaşamaq istəməzsiniz.
Möhtəşəm görünən, bahalı bel çantanızın avtobus və ya təyyarə səyahətindən sonra kirli və rəngi dəyişmiş halda sizə qaytarılması, bu örtüyün əslində nə qədər vacib olduğunu göstərə bilər.
Üstəlik, yeni və bahalı görünən çantalar oğruların diqqətini çəkə bilər. Bel çantanızı qorumağı unutmayın.
Kilidli torbalardan istifadə edin
Bəzən elə anlar olur ki, “Kaş yanımda olsaydı!” dediyiniz əşyalardan biri kilidli torbadır. Pasport kimi həm alınması baha başa gələn, həm də zamana ehtiyac duyulan vacib sənədlərinizin səyahət zamanı islanması sizə həm əlavə xərc, həm də səyahətinizi yarımçıq buraxıb evə dönmək məcburiyyəti yarada bilər.
Ona görə də vacib sənədlərinizi kilidli plastik torbalarda qorumağı unutmayın.
Üzərinizdə çoxlu nağd pul gəzdirməyin
Cüzdanda çox miqdarda nağd pul gəzdirmək həmişə risklidir. Təkcə itirmək və ya oğurlanma ehtimalı yox, həm də bu pulun “nə olar?” narahatlığı sizi daima gərgin saxlayacaq.
Artıq hər yerdə ATM-lər mövcuddur. Ona görə də gün ərzində yalnız xərcləyə biləcəyiniz qədər nağd pul götürün. Demək olar, hər yerdə kartla ödəniş etmək və ya az miqdarda pul çıxarmaq mümkündür.
Bankdan çıxaracağınız məbləğin yalnız bir neçə günlük ehtiyacınızı qarşılaması kifayətdir. Əlinizdəki nağd pulu iki yerə bölüb çantanızın müxtəlif bölmələrinə yerləşdirin. Beləliklə, oğurluq kimi hallarda itirdiyiniz məbləğ, komissiya ödədiyiniz pulu keçməyəcək.
Turist kimi görünməyin
Şəhər adları yazılmış köynəklər geyinməyin. “I❤️Amsterdam” və ya “I❤️New York” kimi yazıları olan köynəklər turist olduğunuzu açıq şəkildə göstərir. Həmçinin futbol formaları ilə gəzmək də kalabalıq içində fərqlənmənizə səbəb olur və sizi “turist hədəfi” halına gətirə bilər.
Yaş artdıqca daha çox istifadə olunan bel çantaları isə həm estetik baxımdan xoş görünmür, həm də "Bütün dəyərli əşyalarım buradadır" mesajı verir. Bu səbəblə daha təhlükəsiz və görünməyən alternativ çanta modellərinə üstünlük verin.
Əgər səyahət etdiyiniz yerdə əşyalarınızı qoyacaq yeriniz varsa, böyük bel çantası ilə gəzməyin. Dar küçələrdə, tarixi yerlərdə və suvenir dükanlarında bu çantalar həm hərəkətinizi məhdudlaşdıracaq, həm də başqalarına çırpılıb narahatlıq yaradacaq.
Yeni dostlar qazanmaqdan çəkinməyin
Əlbəttə ki, yaşadığınız şəhərdə də yeni insanlarla tanış olmaq mümkündür. Amma əksəriyyətimiz öz çevrəmizdən və təhlükəsiz bölgəmizdən çıxmadan eyni insanlarla görüşməyə üstünlük veririk. Həqiqi sehr isə məhz bu təhlükəsiz bölgənin xaricində baş verir.
Səyahət zamanı tanış olduğunuz insanlar bəzən bir günlük, hətta bir neçə dəqiqəlik söhbətlik olsa da, bu qarşılaşmaların sizdə buraxacağı iz böyük ola bilər. Kim bilir, bəlkə ömür boyu davam edəcək dostluqların başlanğıcı məhz bu tanışlıqlardan doğar.
